ازاي أوصل لكل جمهوري ؟؟ 

ازاي أوصل لكل جمهوري ؟؟

اصحاب الشركات بيعملوا أي حاجة عشان يوصلوا للعميل

خد عندك بقي عروض وخصومات ولو اخدت ديه دلوقتي هنبعتلك طيارة على سطح بيتكوا

بس الأهم من ده كله .. ان ازاي أوصل لكل جمهوري اللي ممكن يكون مهتم بمجالك ؟؟؟

= من الإعلانات على السوشيال ميديا اللي بيستخدمها جمهوري اكتر صح ؟؟ شوفت انا مذاكر ازاى 😎

شاطر .. بس ده مش كفاية 🙂

= نعم !!! اومال كل الـ Posts اللي بتكلمني فيها علي اني لازم اخاطب جمهوري من الـ Platform اللي بيستخدموها ديه كانت ايه اي كلام ؟؟؟

لا مش أي كلام .. بس تخيل لو في من جمهورك مش بيستخدم أي Platform اصلا .. هتوصله ازاااااي ؟؟؟

= !!!؟؟؟؟ 

ماترد ياعم الشاطر يا دحيح يا ترعة المفهومية 😂

= ايوه ازاي يعني ؟؟

هديلك مثال .. تخيل مثلا لو انت فاتح مطعم في منطقة شعبية وقررت انك تعمل اعلانات عشان تعرف الناس انت بتقدم ايه

وطبعاً انت عارف يعني ايه منطقة شعبية .. يعني ممكن تلاقي ناس مش بتتعامل مع الـ facebook أو أي Platform تانية

وممكن كمان ميكونش  معاها موبايل Android اساساًً .. هتوصلهم ازااااي ؟؟

= مش لازم اوصلهم كده كده ممكن يكونوا عددهم قليلين

ده اكبر غلط ممكن تعمله لو انت هتفتح مشروع انك ماتهتمش بكل جمهورك 

= طب اعمل ايه ؟؟

مش بتشوف ناس بعد صلاة الجمعة كده بتوزع ورق وانت لما بتاخده بتبص فيه بصة وبترميه

= ايوة انت عايزني اصرف فلوس ورق عالفاضي عشان الناس ترميه

اه

= هو ايه اللي اه انت عايز تخسرني

لا مش عايز بس البصة ديه هتفرق معاك عشان اللي هيبص عليها ممكن يكون مهتم ويجيلك

او ممكن تعمل خطوة احلي .. هو انك تجيب الورق ده وتوزعه على الاماكن الاكتر شهرة في المنطقة اللي انت فيها

وتتفق معاهم انهم اي حد يجيلهم يديهم ورقة أو مع كل طلب بيتحط في شنطة يحطوا ورقة في الشنطة .. ده طبعا غير الاعلانات اللي هتعملها

لازم يكون ذهنك حاضر وتعرف تتصرف في كل الأحوال تخاطب كل الناس

زي ما بيقولوا كده .. خاطب الأخضر واليابس

مش ساعات لما بتدخل اي مول تلاقي بنوتة زي القمر كده واقفة ومعاها برفان واول ماتعدي من قدامها تلاقيها رشت في عينك عشان تشم الريحة

وبعدين تقولك علي الخصم علي طول عشان ماتديلكش فرصة تقولها شكراً عشان ممكن تعجب بالسعر

او تعجب بيها 😂

طب مفكرتش قبل كده ان المكان ده ممكن يكون بيعمل اعلانات على السوشيال ميديا عادي

طب ليه ما قالوش كفاية الإعلانات وخلاص ..؟؟

عشان الناس ديه ممكن يكون ربحها اكتر من الناس اللي بتتفاعل معاها من خلال انهم يرشوا البرفان في وشهم 😂

طب مافكرتش ليه الناس بتجيب دي جي لما يكون في الافتتاح بتاعهم ؟؟

عايزين يعملوا قلبان في المنطقة عشان الناس لو حتي حسيت بالإزعاج تيجي وتقول مين اللي عامل الإزعاج ده

يتقالهم ده فولان ابن فولان فتح محل جديد

هما الناس دي عايزة توصل للنقطة ديه

تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ Digital Marketing