لو مليت.. ازاي ترجع تحب الكتابة تاني

لو مليت.. ازاي ترجع تحب الكتابة تاني

من 2019 لغاية دلوقتي في حالة غير مفهومة على الشعب المصري وتقريباً في العالم كله

تحس إني في حاجة غلط 😂

اللي هو أنا مش عارفني أنا توهت مني أنا مش أنا على رأي الفنان “عبد الباسط حمودة “ إلى آخر الأغنية بقي 😂

والحالة ديه طبعا بتكون موجودة في مجال الـ Marketing

ياسلاااااااااام لما الحالة ديه بتيجي للـ Content Creator يبقى على الله حكايتك 😂

الحالة ديه مش بتخليه عنده فقر في الأفكار.. لا الموضوع أكبر من كده بكتير

حضرتك هو عطل.. جاب جاز.. مش عايز يكتب أصلا

ولإن الحمد لله كل مشكلة وليها حل.. تعالي أقولك لو مليت.. ازاي ترجع تحب الكتابة تاني 😃

✅ خدلك Break حلو كده

انت مش جهاز شغال بالكهرباء أول ما تحط الكهرباء يشتغل.. ده حتي الجهاز بيحتاج إنه برتاح وساعات بيحتاج صيانة يا جدع 😂

عشان كده.. لازم تخصص وقت و مسافة بينك وبين الكتابة تعمل فيها اللي إنت عايزه

خليها مثلا 20 دقيقة تعمل فيها حاجة تشربها تـ Scroll عالـ Facebook شوية تسمع حاجة للست.. ولا بلاش الست عشان الـ 20 دقيقة هيخلصوا في الموسيقى بس 😂😂

انت لما تاخد Break لنفسك ده بيديك وقت إنك ترجع تتشحن تآني عقلياً

ولو انت واقع أوي كده ومش طايق تبص في قلم

فأنا بأرجح لك إنك تاخدلك أسبوع حلو كده في المالديف أو الساحل

ولو انت مفلس 😂 يبقي عليك وعلي إسكندرية يامعلم تاخدلك آيس كريم من ” عزة “ وتروح القلعة وكوبري ستانلي

✅ أكتب في 5 دقايق كده عن نفسك وعن أفكارك وعواطفك

تخيل لما تكون مش طايق الكتابة واجي اقولك أكتب 

حاجة زي إنك نفسك تاكل بس معدتك وجعاك واجي اقولك كل 😂 

بس الحقيقة إن ديه خطوة ممكن تستعيد بيها حبك للكتابة 

انت لما تخلي عقلك يفكر في حاجة تآني مختلفة تكتب عنها حبك واشتياقك للكتابة هيرجع تاني 

في دراسة كده نشرتها مجلة إسمها Academy of Management Journal 

بتقول ايه الدراسة ديه بقي يا سييييييدي ؟؟؟ 🤔 

إن في باحثين جمعوا شوية ناس كده محبطين بسبب فقدانهم لحب الكتابة وقسمهم لـ 3 مجموعات 

طلبوا من مجموعة تكتب كل حاجة تيجي في دماغهم أياً كان بقي حتي لو بتفكر تحضر حفلة لروبي.. أكتب ماتتكسفش مش لوحدك علي فكره 😂 

ومجموعة ثانية تتكلم عن أي حاجة تكون مافيهاش ألم ووجع 

والمجموعة الثالثة معملتش أي حاجة كانت قاعدة بتتفرج عليهم 😂 

لاحظوا إن المجموعة الأولي بتكتب بشغف عن باقي المجموعات

✅ غير المكان اللي بتكتب فيه دايماً

الروتين الممل لما بيركب الواحد مش بيسيبه في حاله

عشان كده حاول تكسر الروتين ده في إنك تغير المكان اللي إنت دايماً متعود تكتب فيه

لو بتكتب في الاوضة روح الصالون لو بتكتب في الصالون روح الأوضة روح المطبخ انشالله تروح الحمام.. بص خليهم يقولوا الواد اتجنن ولا إيه 😂😂

لو اتقفلت من البيت خالص وحاسس إنه بيديلك طاقة سلبية

و لو مشترك في نادي روح أقعد قدام الـ Pool الصبح كده مع كوباية شاي بالنعناع وانسي الدنيا ❤️😍 

لو مش مشترك روح أي مكان في خضرا.. روح حديقة الطفل مثلا أو روح الحديقة الدولية اللي جنب “حمزة ” بتاع الحواوشى ❤️😂 

المهم إنك تبعد عن أي طاقة سلبية أو روتين ممل يخليك تتخنق من أي حاجة بتعملها 

✅ اقرأ.. بس كده 🤷🏻‍♂️😂 

– يعني أقولك مش طايق إني اكتب تقولي أقرا إنت باين عليك فاضي وجاي ترخم عليا 

ارخم عليك إيه بس أنا فاضيلك ياعم انت أنا بكلمك جد 

لو إنت مليت من الكتابة حاول تقرأ أي حاجة متعلقة بمجالك أو أي حاجة مثيرة للإهتمام 

خدلك رواية من على الرف في البيت عندك واقراها وخدلك ركن كده واستمتع 

طب إيه اللي هيحصل بعد كل ده ؟؟ 🤔 

– نسبة ابداعك هترتفع 

– الـ Contents اللي بتكتبها مش هتكون مملة 

– هيكون عندك حماس للكتابة 

– هيكون عندك شغف

✅ خد وقت.. ماتعملش فيه أي حاجة 

لما توصل لمرحلة الكره للكتابة فعقلك ساعتها بيكون مهنج وغرقان في سلبية الكتابة بعيد عنك 

طب إزاي تطلع من الحوار ده  ؟؟ 

في إنك ماتعملش أي حاجة..  ” عن قصد ” 

طب ده بيحصل إزاي ؟؟ 🤔 

في دكتور كده اسمه ” ماركوس رايشيل “ عمل نظام اسمه ” Default mode network.”

وهو إن الدماغ لو بتعاني من ازدحام أفكار أو ملل من الكتابة أو عدم القدرة على أي حاجة من ديه

كل اللي عليك إنك ماتعملش حاجة يأما تغمض عينيك وتخليك ساكن كده

أو تثبت بصرك على شئ معين.. المهم إنك توقف تفكير

تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ Digital Marketing