Blog
يعني ايه Buyer Persona ؟
لو إنت في مجال التسويق يبقي أكيد سمعت عن مصطلح ممكن يكون جديد عليك إسمه ” Buyer Persona “
طيب إيه هو الـ Buyer Persona ده ؟؟
و إيه أهميته ؟؟
و ليه أصلاً مهم ؟؟
عايز أقولك إن الـ Buyer Persona مصطلح من أهم المصطلحات إللي لازم تكون عارفها كويس جداً
علشان كده النهارده هكلمك عن الـ Buyer Persona بالتفصيل و أعرفك كل حاجة محتاج تعرفها عنها
– إيه هي الـ Buyer Persona ؟
هي عبارة عن مصطلح بيعبر عن شخصية العميل المستهدف و تصنيف العملاء المستهدفة
يعني بتدرس عملائك و تعرف سلوكهم و شخصيتهم و إزاي بياخدوا قراراتهم و إيه إللي بيدوروا عليه علشان تعرف تتعامل معاهم و تعرف توفر ليهم إللي محتاجينه منك
لإن من الشائع جداً و الوارد إن يكون ليك عملاء كتير و مختلفين في الشخصية
يعني مثلاً ممكن يكون ليك عميل قبل ما يشتري المنتج بتاعك بياخد رأي كذا حد و بيتشاور معاهم
هنا بقي إنت بتتعامل مع كل فرد من المجموعة دي علي إنه بيبقي ليه رأيه و شخصيته المنفردة
لإن التنوع ده هيفيدك إنت لإنه هيفتح ليك أفكار و هيعرفك أكتر علي الشخصيات إللي بتتعامل معاهم و بيتعاملوا معاك
– ليه الـ Buyer Persona مهمة ؟
أحسن طريقة علشان تكسب ثقة أي شخص عامةً و تكسبه و تقربه ليك أكتر هي إنك تعرفه كويس جداً و تعرف مشاكله و تحلها و تبين ليه الإهتمام أكتر
نفس الكلام المفروض تعمله مع عملائك
لازم تعرفهم كويس جداً و تعرف شخصية العميل الخاص بيك و تعرف مطالبه إيه و تحققهاله و تعرف مخاوفه إيه و تبعد عنها و تطمنه من ناحيتك و تعرف مشاكله إيه و تحلهاله
ساعتها بس هيعرف إن إنت الوحيد إللي مختلف عن باقي منافسيك و إنت إللي مريحه في التعامل معاك
حتي لو سعرك أغلي من غيرك مثلاً مش هيفرق… لإن ساعتها هتكون الغالي إللي ثمنه فيه
– تقدر تستخدم الـ Buyer Persona في إيه بالظبط ؟
تقدر تستخدم الـ Buyer Persona في مجالات كتير و تستفاد منها .. زي :
1- تقدر تستخدمها في الـ Product development و إنت بتبني خريطة المنتج ، و ده هيساعدك في تغيير طريقة عروضك و هيركزها أكتر علي إللي عملائك فعلاً محتاجينه
2 – ممكن تستخدمها في الـ Marketing علشان تبني من خلالها Marketing Strategy و Content Strategy ناجحة تتعامل من خلالها مع عملائك المستهدفين و تجذبهم إليك أكتر
3- و برضو تقدر تستخدمها في مجال المبيعات و تتعرف أكتر علي عملائك المستهدفين ، و خصوصاً لو إنت Sales يبقي لازم تعرف العميل إللي بتتعامل معاه كويس جداً و تعرف مخاوفه إيه و تخليه يواجهها .. و ساعتها هتبقي Sales أكتر فاعلية و منتج أكتر في شغلك
4- و أخيراً .. تقدر تستخدمها في مجال الـ Customer Support ، لإن ساعتها هتبقي عارف كويس جداً مشاكل عملائك إللي بيقابلوها مع المنتج الخاص بيك و تعرف تحلها كويس جداً و تكسبهم من تاني
– إزاي تستخدم الـ Buyer Persona ؟
علشان تبدأ تبني و تستخدم Buyer Persona مش لازم تبدأ علي قاعدة عملائك كلهم
ممكن تبتدي بعميل واحد من عملائك المستهدفين و تسأله أسئلة من خلالها هتعرفه أكتر و تعرف شخصيته كويس جداً و بالتالي تعرف تكسبه ليك
زي مثلاً :
– إسمه إيه ؟
– عمره قد إيه ؟
– حالته الإجنماعية ؟
– ساكن فين ؟
– تعليمه إيه ؟
– إيه الـ Job Title بتاعه ؟
– و إيه الـ Career Path الخاص بيه ؟
– إيه هي الـ Skills بتاعته ؟
– لو شغال شغال فين ؟
– إيه هي القيمة إللي بيقدمها ؟
أسئلة ممكن تكون جزء كبير منها مالهوش علاقة بيك و بمنتجك و متعلقة أكتر بيه و بحياته الشخصية إلي حد ما
بس من خلالها هتقدر تتعرف عليه أكتر و تعرف شخصيته أكتر و مشاكله و تحلهاله و بالتالي تكسب ثقته
وبكده يبقى عرفت يعني ايه الـ Buyer Persona
تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ Digital Marketing