Blog
إزاي تبقي تريند
حلم كل واحد بيستخدم السوشيال ميديا
إنه يبقي تريند عشان الناس تعرفه. إحساس جميل مش كده ؟؟
تعالي أقولك إزاي تبقي تريند على السوشيال ميديا
خلينا الأول نعرف يعني إيه كلمة ” تريند “
الكلمة ديه بتتذكر كتير مابين كلمات كتير بتتقال بين كل الناس علي السوشيال ميديا
ممكن نقول كلمة تريند من المصطلحات اللي ليها أكتر من معني علي سبيل المثال
1- ممكن تكون معناها الاحداث و القضايا اللي حصلت من زمن مش كبير
الحاجات ديه بتتذكر كتير على الـ Facebook و الـ Instagram و الـ Twitter
2- ممكن يكون ” حديث الساعة ” بمعني إنه يكون موضوع متشر جداً بس ماياخدش وقت كبير
3- وعادة يبقي عبارة عن كذا موضوع مهم وساخن جداً و عاجل يجذب إنتباه جمهور السوشيال ميديا
4- إحتمال يكون خبر عاجل زي خبر السفينة بتاعة قناة السويس ياخد فترته ويروح والخبر يتصدر منصات السوشيال ميديا كلها على مستوى العالم مش في الدول العربية بس
5- من المحتمل يكون عبارة عن فيديو تم تداوله في أكتر من مكان
6- التريند من أهم الحاجات اللي بيستخدموها الناس كورقة ضغط للفت الانتباه وجذب المشاهدين
7- يعتبر التريند أشهر مكان بيظهر فيه هو Twitter
8- كمان ممكن يغير في أسعار سلع كتير سواء بالارتفاع أو الانخفاض علي السوشيال ميديا
إزاي بعرف التريند العالمي ؟؟
لو إنت من الأشخاص اللي بتهتم بالتريندات.. هتلاقيها دايماً موجودة على Twitter
1- ادخل على حسابك الخاص
2- دوس علي “خيارات “
3- اختار منها ” الإعدادات و الخصوصية“
4- دوس علي ” تفضيلات المحتوي” وبعدين دوس علي “تريند“
5- ادخل على ” تغيير الموقع” وحدد منها ” حول العالم / Wide World “
وبالطريقة ديه هتعرف تريندات العالم كلها
الجدير بالذكر إن التريند دائم وسريع و بيتغير كتير بشكل مش معقول
ممكن يتغير في يوم وليله وممكن يستمر لكذا يوم وممكن كمان تلاقي أكتر من تريند في يوم واحد بس علي السوشيال ميديا
وعشان كده إنت محتاج دايماً إنك تتابع أول بأول التريند وتعرف كل جديد
بعد ما عرفنا إن تريند يعني ناس كتير جداً استخدمت الموقف ده أو الحدث ده أو الفكرة ديه وبقت تريند وبقت مشهورة بين الناس
طب ليه بتهتم إنك تعمل تريند ؟؟
لو إنت شخص متخصص في السوشيال ميديا فـ ده شئ مفيد جداً ليك إنك تعمل تريند أو تشارك فيه على الـ Facebook أو Twitter لأنك لما بتعمل تريند تقدر توصل فكرتك أو إسمك لناس كتير جداً علي السوشيال ميديا
بفلوس قليلة مقارنة بنسبة الوصول
شركات الموبايلات زي سامسونج أو آبل أو شاومي أو أوبو وباقي الشركات بيعملوا تريند عن الموبايل الجديد الخاص بيهم اللي هاينزل السنادي مثلا
عن طريق إنهم يبعتوا الموبايلات للمراجعين ” الـ YouTubers ” قبل يوم مؤتمر الإعلان عن الموبايل بأسبوع ويقولولهم لازم ينشروا فيديو عن الموبايل في يوم المؤتمر.. وبكده يبقوا خلوا الموبايل تريند ووصل لعدد كبير من الناس
طب إزاي تبقي تريند ؟؟
اختار فكرة ليها علاقة فكرياً أو جغرافياً بيك.. اختار تريند قريب من مجالك وأعمله الموضوع هيحتاج شوية وقت بحث ومتابعة التريندات اللي بتحصل يومياً
وبعد كده تعمل ورشة عمل وعصف زهني ” brainstorming ” لحد ما توصل لفكرة تريند حلوة وفيها كل المواصفات المطلوبة ومن المواصفات ديه إن الفكرة تكون ليها علاقة بمجال شغلك أو منتجاتك أو ليها علاقة بمكان شغلك
أكتب الموضوع بشكل يشجع على التفاعل. كتابة كومنتات والشير.. يعني الموضوع أو المحتوي يكون بيتكلم عن موقف معين بيحصل للجمهور المستهدف بتاعك
لازم تستخدم صورة واحدة على الاقل أو فيديو.. الصور والفديوهات بيكونوا أفضل وأحسن بكتير من الكلام وعشان تزود إنتشارك إستخدم الصور والفيديوهات عشان بيكون فيها كلام مختصر ومفيد
لازم تستخدم وتركز علي العواطف و المشاعر زي مثلا الضحك.. الحزن وهكذا
على سبيل المثال إنك تكون حاسس بمعاناة مندوب المبيعات ده هايخلي المندوبين يشيروا كوميك وميمز كتير عن الموضوع ده ويكون تريند
الإنتماء.. خلي المحتوي بتاعك بنتمي لطائفة معينة من الناس زي الأهلاوية و الزملكاوية لو حتي محبين القهوة محبين السهر وهكذا
استخدم هاشتاج سهل وواضح.. لو هتركز على الـ Facebook بس ممكن نستغني عن الهاشتاج لأن الهاشتاج بيكون حلو ومفيد آكتر على Twitter
لكن بشكل عام استخدم كلمات واضحة وصريحة وملهاش طرق مختلفة في الكتابة
لإن طرق الكتابة المختلفة هتخلي الهاشتاج يتقسم لأكتر من هاشتاج وده هيخلي التريند صعب الوصول والاستمرار
حاجة اخيرة.. لازم توصل لـ 10000 متفاعل عشان تعرف تعمل تريند.. التريند هايحصل لو الناس شاركت فيه.. وشاركته على الجروبات وعملوا تصميمات جديدة بيقلدوا فيها التريند
حاول توصل لأكبر عدد من الناس اللي بتنشر كتير عشان يشاركوا فيه
والأفضل كمان إنك تشارك التريند في الجروبات اللي بتدعمه زي جروبات العاملين في مجالات التسويق وترويج الإعلانات
تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ Digital Marketing