Blog
تعرف إن في وظائف مهددة بالإنقراض ؟!
بالظبط زي ما بقولك كده
في وظائف مهددة بالإنقراض و هتنتهي تماماً و منهم وظائف كتير جداً كنا في يوم من الأيام بنعتمد عليها بشكل كبير جداً
بسبب تطور التكنولوجيا في العالم
تعالي أقولك أهم الوظائف إللي مهددة بالإنقراض
1- التاكسي
من فترة مش بعدية لو كنت مستعجل و عايز تروح مشوارك بكل سهولة و ماعندكش وقت كنت بتركب أول تاكسي يقابلك و تروح مشوارك بكل سهولة
شوية في شوية ظهرت حاجة جديدة علينا خالص إسمها Uber
و الناس كلها كانت مستغرباها و مايعرفوش دي إيه و بتستخدم إزاي
كمان الناس بعد ما عرفوا برضو شككوا فيها و كانوا قلقانين منها و مش مصدقين إن في App تقتدر من خلاله تطلب عربية و حديثة كمان و تتعامل فيها معاملة أحسن من إللي كنت بتتعاملها في التاكسي العادي و توصل مشوارك بكل سهولة من خلاله لأ و كمان تدفع فلوس أقل
و كان ساعتها الشباب بس هم إللي بيستخدموا الـ App ده لإن الشباب هم إللي دايماً بيغامروا و بيجربوا الحاجات الجديدة
لحد ما دلوقتي بقي كبير و صغير مابيستخدموش غير Uber و غيره من الـ Apps
و التاكسي دلوقتي بقي قليل جداً و يكاد يكون منعدم إللي بيستخدمه
2- بائع الجرنال ( الصحافة الورقية )
فاكر آخر مرة حبيت تعرف الأخبار فقررت تشتري جرنال كان من إمتي ؟
أكيد كان من مدة كبيرة جداً
و ده لإن طبعاً الصحافة الورقية مابقيتش منتشرة ولا مؤثرة زي الأول ولا ليها أهمية
لإن طبعاً دلوقتي الصحافة الإلكترونية زي مواقع الأخبار و السوشيال ميديا حلت محلها بشكل كبير جداً
دلوقتي إنت لو عايز تعرف أخبار النهاردة أو أي يوم ، بتخش وحش الأخبار و هو موقع اليوم السابع و إللي دلوقتي بقي أهم و أكتر مصدر للأخبار موثوق فيه ، و تعرف الأخبار القديمة و الجديدة بكل سهولة
و من غير بقي ما تقعد و تمسك الجرنال و تفضل تقلب من صفحة لصفحة و إنت حاطت رجل علي رجل و إنت بتحتسي قهوتك الصبح … كل الكلام ده بقي مش هيبقي موجود
3- الكاشير
للأسف وظيفة الكاشير بقيت من ضمن الوظائف مهددة بالإنقراض و الإنتهاء تماماً في الفترة إللي جاية دي
و ده لإن في الفترة إللي جاية دي التعاملات الورقية هتقل بصورة كبيرة جداً و تكاد تكون هتختفي كمان
لإن زي مانت عارف التكنولوجيا مابتثبتش في مكانها و دايماً في تطور مستمر
فبالتالي التعاملات الورقية هتحل محلها البطاقات البنكية و هيبقي كله بيتعامل بالفيزا و كل طرق الدفع هتكون عن طريق الموبايل بس !!
رحمة الله علي كل شباب تجارة
4- الفلاح المزارع
الفلاح المزارع الأصيل إللي كلنا عارفينه .. هينقرض !!
للأسف الكلام ده صح .. و ده لإن الأساليب الزراعية القديمة إللي كلنا عارفينها و متعودين عليها قلت بصورة كبيرة و حل محلها أساليب حديثة
و ده بفضل تطور التكنولوجيا و إللي إستبدلت الفلاح و العمال إللي بيشتغلوا في الأرض الزراعية بالآلات الزراعية الحديثة
زي الجرارات الزراعية الآلية و زي الطائرات الصغيرة ( Drone ) و بدأت تستخدمها في ري الأرض و تجريفها و في كل حاجة ليها علاقة بالزراعة
و الإنسان الوحيد إللي اتضر من كل ده هو الفلاح المزارع
5- الطباعة و النشر
ناس كتير هوايتها هي قراءة الكتب و الروايات بإختلاف أنواعها و إختلاف المؤلفين
بس للأسف بعد إرتفاع سعر الورق في مصر من 6 آلاف جنيه للطن لـ 18 ألف جنيه للطن هيبقي إستخدام الورق قليل جداً
و بالفعل في شركات قللت من طباعتها بحكم إرتفاع السعر بالصورة دي
و ده إللي هيوجه الناس للكتب الإلكترونية ( E-Books )
تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ تسويق إلكتروني