Google Tips

تعرف إن Google في شوية Tips هتسهل عليك عمليات البحث و هتوفر عليك شوية وقت حلوين

قبل ما أقولك عليها ، تعالي أقولك كلمتين كده و أفضفض معاك شوية

بص يا سيدي

من ساعة ما العالم كله بقي معاه موبايل و بقي أي حد يسمع عن أي حاجة يخش يعمل Search عليها في Google ، و بقينا مش محتاجين ننزل و نسأل و ندور

و بقيت لما تيجي تسأل أي حد عن أي حاجة يقولك ( طيب يا عم ما تـ Google It أسهل )

كمان لو الواحد تعب حبتين بيسأل Google و مابينزلش لدكتور مختص

و بقينا علاقتنا بـ Google علاقة الإبن بأمه 😂

عايز أخبار تسأله ، عايز أفلام تسأله ، عايز تذاكر تسأله ، لو بتفكر في الجواز و متردد خش إسأله برضو عادي مش غريب

بس ، أنا لاقيت إن الواحد علاقته بـ Google أقرب من علاقته بناس كتير في حياته ، فقررت إني أقولك علي شوية Tips كده تسهل عليك تعاملك مع الأخ Google
1- تصفية الـ Search

ساعات لما تعمل Search في Google علي حاجة تلاقي جابلك كل حاجة إلا إللي إنت بتدور عليها أصلاً

و ده ليه ؟

لأن Google بيعتمد علي الـ Keywords في إنه يدورلك علي الحاجة إللي بتعمل عليها Search

بس إنت عارف في كام حد مستخدم الـ Keyword إللي إنت بتعمل بيها Search ؟

عدد كبير جداً مستخدم نفس الكلمة و بنتائج مختلفة

علشان كده في رموز بتستخدمها في الـ Search Bar مع الكلمة إللي بتبحث بيها هتخلي عملية البحث دقيقة أكتر
– الـ ( : )

الرمز ده بتستخدمه لما تعوز تدور علي حاجة معينة في منتج معين مثبلاً

زي مثلاً لما تكون بتدور علي منتج معين للبيع ، لو كتبت إسم المنتج هيجيبلك حاجات كتيرة عنه إنت مش محتاجها

لكن لو كتبت ( إسم المنتج : و إسم المكان إللي بتدور عليه فيه ) هتلاقي إللي بتدور عليه بالظبط
2- الـ Advanced Search

الـ Advanced Search ناس كتير ماتعرفش عنها حاجة ولا بتستخدمها أصلاً

و هي عبارة عن صفحة كده بتدخل عليها بتعمل عملية فلترة للـ Search بتاعك

و بتوصل أسرع و أسهل و أدق للحاجة إللي بتدور عليها

طيب هي فين الصفحة دي ؟

خش علي Google هتلاقي فوق علي اليمين علامة ترس ، دوس عليها و إختار الـ Advanced Search ، و عيش
3- حدد التاريخ

لما بتيجي تعمل Search في Google علي حاجة معينة هتلاقي الحاجة دي بتواريخ كتيرة جداً

فلو بتدور عليها بتاريخ معين ، تقدر تحدد التاريخ ده قبل ما تعمل عملية البحث

و ده لما تخش علي كلمة Tools أو ( أدوات ) تحت الـ Search Icon ، دوس عليها و إختار Any Time و حدد التاريخ زي مانت عايز
4- إبحث بالصورة

آخر حاجة و دي إللي عجبتني و مريحاني بصراحة في حاجات كتير هي إنك ممكن تبحث علي حاجة معينة بصورة ليها

هقولك إزاي

خش علي Google Images هتلاقي جنب الـ Search Bar علامة كاميرا كده دوس عليها

وهيطلب منك ترفع صورة من عندك ، إرفع الصورة إللي إنت عايزها ، بعدها هيجيبلك كل حاجة عن الصورة دي

و من أكتر من موقع

بس كده يا سيدي ، دول كانوا كام Tips كده خاصين بـ Google هتسهل عليك حاجات كتير و وقت و إنت بتعمل Search

تابعنا علي صفحتنا علشان تعرف كل جديد