Blog
- مارس 2, 2024
- Posted by: admin
- Category: Uncategorized
الجودة ولا السعر
الجودة أو السعر اختياراتنا مختلفة ، و لأننا بشر فكل واحد فينا بيبقي ليه معايير في الاختيار ،
النهاردة هنتكلم علي معيارين مهمين من معايير الاختيار ، الجودة و السعر.
و لأن كل معيار فيهم أبعاده مختلفة و بتأثر في أشخاص معينة و بتتأثر بعناصر مختلفة ،
فتعالوا نشوف الفرق بين الاتنين ” الجودة ولا الشعر “
مع شوية تفاصيل عن العوامل اللي بتأثر علي اختياراتنا بين المعيارين دول.
-لما بنيجي نشتري منتج ، بيبقي قدامنا عدة اختيارات ، و بناءً علي حبة معايير بنحطها قدامنا و احنا بنختار.
و بناءً برضه علي حبة عناصر خارجية ممكن تأثر علينا و علي قرارنا أثناء عملية الشراء .
بنختار المنتج معيار مهم من المعايير دي هوا جودة المنتج اللي بشتريه أو الخدمة اللي بطلبها ، و السعر النهائي للمنتج أو الخدمة دي.
الجودة:
أبسط وصف أو تعبير لمصطلح “الجودة” هوا كون المنتج يلبي ويتجاوز جميع المتطلبات والمعايير والمواصفات.
يعني ايه؟ يعني المنتج اللي انتا بتشتريه أو الخدمة اللي بتطلبها لازم تكون بتلبي المتطلبات منه و ده الحد الأدني للجودة .
و بعد كده بتزيد بمدي تجاوز المنتج للمتطلبات و المعايير دي ، كمثال بسيط لو رايح أشتري قلم من المكتبة فبكل بساطة بقول إن القلم ده “جيد” لو القلم بتتوافر فيه 3 شروط الوظيفة ، الخامة ، فترة الصلاحية.
يعني لو القلم بيكتب “الوظيفة” ، و خامة مقبولة مش هيتكسر وانتا بتكتب ايه “الخامة” ، و القلم هيديك متوسط الفترة الطبيعية لأي قلم واللي هنقول إنها مثلاً أسبوع استعمال متواصل “فترة الصلاحية”.
يبقي القلم ده كويس “جيد” و هنا الجودة بتبقي في أدني الدرجات المقبولة ليها.
طبق المثال ده علي اي منتج عندك هتلاقيه عقلاني جداً ، طب هل ده المقصود من الجودة؟ ، لا طبعاً المقصود من لفظ الجودة هنا إن الحد الأدني ليها.
بيبقي لما المنتج بيلبي الغرض المطلوب منه ، لكن عشان أقول إن معياري في المنتج الجودة يبقي لازم المنتج يكون بيتخطي المتطلبات و المعايير دي.
طبق الفكرة دي علي القلم بتاعنا ،
هتلاقي إن القلم ممكن يكون بيكتب و يمسح في نفس الوقت ، قلم بكذا لون ،
سن القلم مناسب بيطلع خط الكتابة جميل ، خامة القلم ممكن تبقي معدن او ممكن كمان تبقي مطلية بالدهب ،
فترة صلاحية القلم ممكن تبقي مدي الحياة في حالة وجود مواصفات زي إمكانية إعادة تعبئة الحبر داخل القلم مثلاً ،
هتلاقي نفسك كل ما بتزيد في المواصفات عن الحد الطبيعي ، نسبة جودة المنتج بتزيد معاك و هيا دي الجودة اللي بنقصدها كمعيار مهم من معايير الاختيار
السعر:
مفيش خلاف علي إن السعر هوا المحرك الرئيسي لفئة كبيرة جدا من العملاء ،
و معيار مهم في قرار الشراء ، و النسبة الأكبر من العملاء بتبص علي السعر قبل ما تبص علي مواصفات المنتج
و لو السعر معقول بالنسبة ليهم بيبدأوا يبصوا علي مواصفات المنتج ،
ولأن السعر فيه وصف مهم أوي في البيزنس ، و هيا إنه أكتر عنصر و معيار مرن في عملية الشراء ،
يعني كتيرهتلاقي عملاء بيفاصلوا في السعر ، بس نادراً ما هتلاقي عميل بيفاصل في الخامات مثلاً ،
بالعكس ممكن ياخد الخامات حجة يحاول بيها يقلل من سعر المنتج ، بس خليني أقولك أكتر فئة بتاخد السعر كمعيار رئيسي هيا الفئة اللي عندها قوة شرائية أقل ، اللي بتبقي بعيدة شوية عن ال Luxury Zone أو منطقة الرفاهية ،
الفئة اللي أغلب قرارتها مبنية علي مدي احتياجها للمنتج و دي الفئة اللي بنسميها Price Oriented ، يعني السعر هوا اللي بيوجههم و المعيار الأهم بالنسبالهم في اتخاذ قرار الشراء
الجودة ولا السعر؟
الجودة ولا السعر السؤال ده ملوش إجابة مثالية ،
بس لو انتا عندك بيزنس و عايز تفهم تلعب علي أنهي معيار في دول عشان تشد العميل أكتر
فخليني أقولك إن ده بيعتمد علي نوع العميل بتاعك ، يعني توجه العميل إيه ، ايه أكتر الأسئلة اللي بيسألها ،
نسبة الشراء الفعلي من العملاء اللي بتدخل المكان عندك أو بيبعتولك علي السوشيال ميديا قد ايه ،
لو أكتر الأسئلة علي السعر ، و أغلب الناس مبتكملش تواصل بعد ما تسمع السعر بتاعك ،
ولو توجه العميل دايماً إنه مستكتر السعر بتاع المنتج بتاعك يبقي هنا إنتا محتاج تلعب عالسعر كمعيار شرائي عند أغلب العملاء بتوعك ،
و لازم تبقي عارف إن عملية تخفيض السعر مينفعش أبداً إنها تأثر علي جودة المنتج و لازم تحافظ دايماً علي النسبة و التناسب بين سعر المنتج بتاعك و جودته ، لكن ممكن تعمل عروض و تخفيضات علي سعر المنتج بتاعك ،
لو توجه المنتج بعد الشراء يعني لقيت إن ردود الفعل علي المنتج مش أحسن حاجة ، الشكاوي من المنتج كتيرة ،
الريفيوهات وحشة و كذا حد اشتكي من حاجة في المنتج او الخدمة بتاعتك ،
هنا انتا محتاج تلعب علي الجودة بتاعت المنتج عشان متخسرش العملاء بتوعك و العملاء المحتملين كمان ،
وتتجنب تناقل العملاء لعيبو المنتج بتاعك بدرجة تخليهم يتناسوا أي مميزات تانية و ده يدي فرصة للمنافسين بتوعك إنهم يتوسعوا في السوق و يزودوا حصتهم علي حسابك
في النهاية
لازم كل فترة تعمل أستطلاع رأي للعملاء بتوعك ، عشان تعرف ايه مميزات المنتج بتاعك و ايه عيوبه و تعرف تفاصيل أكتر تخليك تقدر تطور من منتجك و توصل لقاعدة عملاء أكبر سواء عن طريق اللعب علي معيار السعر و التخفيضات ، أو اللعب علي معيار الجودة و المواصفات عشان تقدر تتوسع و تفضل دايما محافظ علي حصتك من السوق
تابعنا علي موقعنا الالكتروني: موقعنا الالكتروني أو من خلال صفحتنا علي الفيسبوك: الفيسبوك