Blog
جربت تعمل إعلان ناجح قبل كده ؟
سواء جربت أو لأ مش مهم
لإني النهارده جي أقولك علي الخطوات إللي من خلالها تقدر تعمل إعلان ناجح و مايخرش المياه
تعالي أعرفك إيه هي الخطوات
1- إعرف إيه إللي يخليك مميز
لما بتروح تشتري منتج معين من مكان معين و ممكن كمان يكون في مكان تاني جنب المكان إللي إشتريت منه المنتج و بيبيع نفس المنتج بنفس المواصفات
طيب تفتكر إيه إللي خلاك تشتري المنتج ده من المكان الأولاني و مش من المكان التاني ؟
ده لإن أكيد المكان الأولاني مميز عن المكان التاني في حاجة شدتك و شدت إنتباهك ليه
زي مثلاً إن المكان الأولاني عامل عروض مبهرة عن المكان التاني
أو مثلاً إن المكان الأولاني الخدمة فيه أحسن بكتير من المكان التاني
و هكذا
إنت كمان إعرف إن في ناس كتير زيك و بتبيع نفس المنتج بتاعك أو الخدمة إللي بتقدمها
إنت بقي المفروض تعرف إيه هي مميزاتك إللي موجودة فيك و مش موجودة في منافسينك
و علشان تعرف ده لازم تحلل منافسينك كويس جداً و تعرف إيه هي نقاط ضعفهم و تستخدمها لصالحك
و إيه هي نقاط قوتهم و تحاول تتعلم منها و تزود عليها كمان
2- إجذب إنتباه جمهورك
دلوقتي الناس بتشوف إعلانات كتير و هي بتقلب في الـ Facebook ولا بتعمل Search في Google ولا أياً كانت الـ Platform
و طبعاً مش كل إعلان هيقرأوه بالكامل
علشان كده لازم تتأكد من إن إعلانك يجذب إنتباه إللي بيشوفه
و علشان تعمل كده لازم تركز جداً علي الـ Headline بتاع الإعلان
يعني مثلاً ممكن تبدأ الإعلان بـ Headline بيعبر عن الميزة إللي فيك و إللي بتقدمها لجمهورك
زي مثلاً إلحق العرض أو ببلاش أو أي حاجة بتبين إنك مختلف عن غيرك
3- قدم لجمهورك عروض ماتترفضش
خلينا متفقين إن الناس بتحب الحاجة إللي بيبقي عليها عروض مجزية أو ببلاش
اه في ناس مابتبصش علي السعر و بتبص علي الجودة أكتر
بس برضو في ناس أكتر بتبص علي السعر و العروض المجزية
علشان كده لازم علي قد ما تقدر تحاول تبقي إنت أقل سعر في منافسيك و في نفس الوقت الجودة هي هي أو أحسن كمان
و دايماً قدم لجمهورك عروض ماحصلتش و ماتترفضش
4- إتكلم عن الفوائد
كلامك عن مميزاتك و خدماتك دي حاجة مهمة طبعاً
بس الأهم إنك تتكلم عن الفائدة إللي هتعود علي جمهورك لما يستخدموا المنتج أو الخدمة إللي بتقدمها ليهم
و تشرح ده بالتفصيل و تخلي إللي بيقرأ كلامك يبقي مهتم جداً بالمنتج أو الخدمة دي بعد ما كان بيقرأ الإعلان بس
5- إتخلص من مخاوف جمهورك
ناس كتير بتبقي خايفة قبل ما تشتري المنتج أو الخدمة من إنهم يندموا بعد ما يشتروا المنتج ده
و ده طبيعي لإنهم بيدفعوا فلوس في المنتج ده و أكيد هيبقوا مهتمين و مركزين في المقابل إللي هياخدوه و دايماً هيقارنوا و يشوفوا إذا كان المقابل مجزي ولا لأ
علشان كده لازم تطمنهم من ناحية المنتج أو الخدمة إللي بتقدمها ليهم
و علشان تعمل ده محتاج تعمل شوية حاجات
من ضمنهم إنك مثلاً تعرفهم إنهم ممكن يسترجعوا فلوسهم في حال إنهم مش راضيين عن المقابل إللي قدمتهلهم
6- إهتم بالـ Call To Action
من ضمن الخطوات المهمة برضو علشان تعمل إعلان ناجح هي إنك بعد ما تعمل كل إللي فات ده تبتدي تطلب من الناس إنهم يتواصلوا معاك و تشجعهم أكتر إنهم يشتروا المنتج أو الخدمة إللي بتقدمها ليهم
و علي سبيل المثال .. الـ Call To Action ممكن تحفز جمهورك في إنهم يبعتولك رسائل علي الصفحة أو يبعتولك علي الـ E-mail أو يزوروا الـ Website الخاص بيك .. و هكذا
و دول كانوا أهم الخطوات إللي من خلالهم تقدر تعمل إعلان ناجح
تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ Digital Marketing