Blog
نماذج التسويق هي حاجة من أهم الحاجات إللي لازم تكون عارفها و دارسها كويس جداً علشان تعرف تعمل إستراتيجيات و خطط تسويقية محترفة و ماتخرش المياه
و نماذج التسويق أو الـ Marketing Models هي عبارة أدوات و خطوات بتوضحلك حلول و طرق كتير من خلالها تقدر توصل للهدف إللي عايز توصله .. سواء كان النموذج ده للتحليل أو للبيع أو أياً كان الهدف .. و النماذج بتختلف بإختلاف أنواعها و أهدافها
علشان كده أنا جي أعرفك بإختصار علي أهم النماذج إللي هتحتاجها في مجال التسويق
1- نموذج SWOT التحليلي
هو إختصار لـ 4 كلمات .. و هم
نقاط القوة ( strengths ) ، نقاط الضعف ( weaknesses ) ، الفرص ( opportunities ) ، التهديدات ( threats )
و النموذج ده بتستخدمه لما تكون عايز تحلل نفسك أو منافسينك
بتبتدي الأول تعرف إيه هي نقاط قوتك و إيه إللي بيميزك عن غيرك
و بعدين بتشوف نقاط قوتك و تعرف إيه إللي غيرك أحسن منك فيه و تبتدي تشتغل عليه
و إيه هي الفرص إللي ممكن تستغلها و إللي ممكن تخليك في حتة تانية خالص و تنقلك نقلة كبيرة لمكانة أعلي
برضو بتعرف إيه هي التهديدات إللي بتواجهك و بتواجه الـ Brand الخاص بيك في المستقبل و تبتدي تعمل حسابها و تتجنبها
و النتيجة لازم تكون أربع أرباع .. بمعني
لازم تكون مرة نقاط القوة بالنسبة للفرص ، و نقاط القوة بالنسبة للتهديدات , و بعدين نقاط الضعف بالنسبة للفرص ، و نقاط الضعف بالنسبة للتهديدات
2- نموذج 7Ps التسويقي
و نموذج الـ 7Ps هو عبارة عن مزيج تسويقي بيشرح مراحل إستراتيجية العمل
و بيوضحلك 7 عناصر مهمين و هم :
المنتج ( product ) ، السعر ( price ) ، و المكان ( place ) ، و الترويج ( promotion ) ، و الأشخاص ( people ) ، و العملية ( process ) ، و الأدلة المادية ( physical evidence )
و من خلاله تقدر تحلل كل جزء في شركتك علشان تحسن إستراتيجيات العمل إللي هتمشي عليها و تطبقها
3- نموذج STP التسويقي
نموذج STP هو إختصار لـ :
التجزئة ( segmentation ) ، و الإستهداف ( targeting ) ، و تحديد الموقع ( positioning )
و النموذج ده نموذج شائع و منتشر في الشركات لإنه بيوضح طرق تعامل الشركات مع العملاء
لإنه بيوضح عملية مكونة من 4 خطوات بتقدم فيهم رسائل نصية للعملاء المستهدفين
و بيشرح إن أول خطوة بتاخدها الشركة هي تجزئة السوق و إللي فيها بتبتدي الشركة تحدد الخصائص المهمة لكل مجموعة في السوق
و الخطوة إللي بعديها هي الإستهداف و إللي فيها بتحدد الشركة الناس إللي أكتر تقبل للمنتج الخاص بيها و بتبتدي تحط إستراتيجية منظمة تستهدفهم من خلالها
4- نموذج AIDA البيعي
هو نموذج بيعي بيركز علي العميل و المراحل إللي بيمر بيها مع الـ Brand ، و بيوضحلك إزاي تخلي العميل يمر بالمراحل دي و تنتهي بإنه يشتري منك أو يتعامل معاك
و هو إختصار للـ 4 مراحل إللي بيمر بيها العميل .. و هم :
– الوعي ( awareness )
و إللي فيها العميل بيبتدي لسة يمع أو يعرف عن الـ Brand ده و يعرف بيقدم إيه
– الإهتمام ( interest )
و في المرحلة دي بيبتدي الـ Brand يشد إنتباه العميل أكتر و يخليه مركز معاه و يخليه مهتم جداً بيه
– الرغبة ( desire )
و هنا بقي الـ Brand بيحول العميل من مرحلة الإهتمام لمرحلة الإهتمام لمرحلة الرغبة في التعامل معاه
– التعامل ( action )
و هي آخر مرحلة و إللي فيها العميل بيقتنع تماماً بالـ Brand و قرر خلاص إنه يتعامل معاه أو يشتري منه
5- نموذج دورة حياة المنتج
نموذج دورة حياة المنتج هيخليك قادر تحسن من منتجاتك الحالية و تطور منتجات جديدة و كمان هتعرف إزاي و إمتي توقف إنتاج منتج معين
و ده من خلال 4 مراحل بيشرحهم ليك و من خلالهم هتقدر توجه مجهوداتك التسويقية صح ، و هم :
– مرحلة التقديم ( Introduction )
و في المرحلة دي المنتج بيكون لسة بيتقدم في الأول للناس أو للمستهلكين
و الرحلة دي بتحتاج جهود تسويقية وترويجية عالية جداً علشان تعرف الناس بالمنتج و تزود وعيهم بالمنتج
– مرحلة النمو ( Growth )
و في المرحلة دي المنتج بيكون إبتدي يتعرف و يكتسب شعبية و شعبيته في تزايد مستمر
و بيبني قاعدة عملاء و بتبتدي توسع و تكبر
– مرحلة النضج ( Maturity )
في المرحلة دي النمو إللي كان فيه المنتج بيقف و بيبقي صعب جداً
و بيبتدي المنتج يثبت مكانه و بتحتاج إنك تغير إستراتيجياتك و تحاول تشوف إستراتيجيات جديدة علشان تحاول ترجع لمرحلة النمو تاني و تحاول تطول مدتها بأي طريقة
– مرحلة الإنحدار ( Decline )
في المرحلة دي بيكون كل جهودك لتثبيت فترة النمو فشلت و المنتج مبيعاته بتقل بشكل كبير و جهود تسويقه بتقل جداً
علشان كده في المرحلة دي بيكون الحل الأمثل ليك إنك تدور علي منتج تاني و تبدأمن تاني معاه نفس الدورة دي من أولها و توفر جهودك التسويقية و البيعية للمنتج ده
و دول كانوا أهم نماذج التسويق ممكن تحتاجهم و هيفيدوك جداً في شركتك أو الـ Brand الخاص بيك
تقدر تتابعنا علي مدونتنا أو علي صفحتنا علي الـ Facebook علشان تعرف كل إللي يفيدك في مجال الـ Digital Marketing