Blog
الفرق بين مفهوم التسويق و مفهوم المبيعات
- January 23, 2024
- Posted by: admin
- Category: Uncategorized
الفرق بين مفهوم التسويق و مفهوم المبيعات
كلنا عارفين إن جزء مهم جداً في أي بيزنس هوا التسويق ، و إن الترويج للخدمة أو المنتج خطوة مهمة جداً عشان توصل للعملاء بتوعك.
و بعد كده تتم عملية البيع ، هل ده معناه إن التسويق هوا هوا المبيعات ؟ و لا الاتنين ملهمش علاقة ببعض.
تعالي أقولك الفرق بين مفهوم التسويق و مفهوم المبيعات
التسويق:
التسويق ليه أكتر من تعريف ، كلهم بيدوروا حوالين نقط محددة ، د.فيليب كوتلر ، واحد من الشخصيات الرائدة في مجال التسويق.
و الحاصل على الدكتوراه الفخرية في علم التسويق عرف التسويق علي إنه “علم و فن الاستكشاف والإبداع وتقديم لقيمة لتلبية احتياجات السوق المستهدف”.
و ده بيلخص دور التسويق في أي مؤسسة ، و هو أي نشاط بيحصل جوا أي مؤسسة عشان تعزز من وجودها و ظهورها و علامتها التجارية في السوق و هنا التسويق بيخدم بشكل غير مباشر المبيعات ، يعني ترويجي للمنتج أو الخدمة اللي بقدمها أو علامتي التجارية ده في حد ذاته مش بيع ، طب ايه هوا البيع؟
البيع:
البيع باختصار كده هو عملية بيع منتج أو خدمة بمقابل مادي ، يعني التعامل هنا مبني أساساً على الجزء المادي إضافة إلي شوية حاجات تانية زي السوق اللي ببيع فيه المنتج ده ، المستهلكين اللي بيشتروا المنتج ، و التوقيت اللي ببيع فيه ، و الترويج للمنتج نفسه ، يعني التسويق هنا فيه جزء بيدخل منه في عملية البيع و هوا الترويج للمنتج نفسه ، و هنا لازم نوضح الفرق بين مهام كل وظيفة فيهم
مهام التسويق:
في التسويق، المطلوب منك إنك تحسن من شكل المنتج في عين العميل ، تطور من شكل الخدمة أو المنتج ، تشتغل علي الأفكار اللي توصلك للعميل بأحسن شكل ممكن ، تدرس احتياجات السوق والعميل و المواصفات اللي بيدور عليها ، و في نفس الوقت ، تخلق جواه الحاجة للمنتج أو الخدمة اللي بتقدمها عن طريق إنك توصل لنقطة تعادل مع العميل و تبقي باصص معاه من نفس الشباك على نفس الحاجة.
مهام المبيعات:
لكن في المبيعات انتا بتبيع خدمة أو منتج ، فكل تركيزك علي عملية البيع نفسها و كل جوانبها ، تتابع احتياجات العميل نفسه ، توضحله المميزات اللي في المنتج أو الخدمة حتى لو كانت المميزات دي باينة بس تركيزك عليها بيخلي العميل يركز فيها أكتر ، و بيتم تقييم مسؤول المبيعات بعدد عمليات البيع اللى قام بيها ، حصيلة شغلك في المبيعات بتتركز أكتر علي الجزء المالي أو العائد اللي انتا جبته للشركة من عمليات البيع اللي قمت بيها.
و عشان كده بنسمي مسؤول المبيعات بالشريك الغير شرعي في أي مؤسسة ، لإن كل عملية بيع بيقوم بيها بيبقي ليه نسبة منها، لكن قسم التسويق مسؤول عن احتياجات العميل و ضمان إن المنتج والخدمة و العلامة التجارية ظاهرين في أفضل حالاتهم و حصيلة شغله ملهاش علاقة بكون العميل اشتري أو لأ.
في النهاية
سواء كنت في قسم المبيعات أو قسم التسويق ، فانتا بتخدم البيزنس اللي انتا فيه على مستويات مختلفة ، و المسمى مش هوا المهم ، المهم هوا إن انتا تؤدي كل متطلبات الوظيفة على أكمل وجه عشان تقدر تسيب بصمة في مجالك
تابعنا علي موقعنا الالكتروني: موقعنا الالكتروني أو من خلال صفحتنا علي الفيسبوك: الفيسبوك